咱霧峰的鄉親逐家好，咱霧峰出gâu人，獻堂仙佇日本時代創立文化協會，提升民眾的智識，發動議會請願運動，爭取台灣人的參政權。你敢會講，伊做政治活動是食飽傷閒咧？
仝款的道理，阮出來傱罷免，是想欲愛台灣回復正常，莫閣予中國烏白舞。中國是發明武漢肺炎予全世界亂操操的國家，阮認為應該閃較遠咧。
恁愛知影，牽涉著公共的代誌就是政治，政治就是生活。丸仔有偷摻硼砂無？衫仔褲的染料有毒無？起大樓鞏紅毛塗有偷工減料無？過車路有安全無？幼稚園的補助會發無？出版小說會予掠去關無？健保費啥物人毋免納？抑是買枴仔補助有偌濟錢？遮的攏是政治。
佇民主社會，咱選民討論政治是真四常的代誌，民主毋是干焦投票爾爾，公民愛繼續監督人民的公僕。當然，立委一個月領二十萬有好好仔做工課無？中國的飛行機有飛來台灣無？卸任的總統有咧賣台灣無？遮的，嘛攏是政治。
恁愛知影，恁攏是立法委員的主人。立法委員是咧審查法案的人，應該愛建立制度，毋是來拆厝的，嘛毋是來做米粉炒食甲暢飽的。伊是領咱的薪水鬥相共治國家的人，毋是咧予你心裡驚惶的人，嘛毋是看著伊就強欲跪落來的人。
騙你講毋莫插政治的人，就是詐騙集團，想欲予你放袂記得，咱人民是國家的主人。希望逐家冗早覺醒，台灣賰無寡濟時間矣。
原發表日期：20250505
